திண்டுக்கல்: திண்டுக்கல், அக். 22: சமூக ஊடகங்கள் வாயிலாகப் பரப்பப்படும் குற்றச் செயல்கள் மற்றும் சட்டவிரோத இணையச் செயல்பாடுகளைக் கண்காணிப்பதில் திண்டுக்கல் மாவட்ட காவல்துறை தீவிரமாகச் செயல்பட்டு வருகிறது. தமிழ்நாடு காவல்துறையின் சார்பில் 2026-ஆம் ஆண்டில் மேற்கொள்ளப்பட்டு வரும் ‘டிஜிட்டல் விஜில்’ நடவடிக்கையின் ஒரு பகுதியாக, இன்று (22.10.2026) வரை மாவட்டத்தில் சமூக ஊடகங்களில் பதிவிடப்பட்ட குற்றவியல் உள்ளடக்கங்கள் தொடர்பாக மொத்தம் 50 முதல் தகவல் அறிக்கைகள் பதிவு செய்யப்பட்டு, 21 பேர் கைது செய்யப்பட்டுள்ளனர். மேலும், சட்டவிரோதமானவை எனக் கண்டறியப்பட்ட 14 சமூக ஊடகப் பதிவுகள் முடக்கப்பட்டு நீக்கப்பட்டுள்ளன.
தனிநபர்களுக்கு மிரட்டல் விடுத்தல், அவதூறான அல்லது சட்டவிரோதமான கருத்துகளைப் பரப்புதல், போதைப்பொருள் பயன்பாட்டை ஊக்குவித்தல், சட்டவிரோத ஆயுதங்களைக் காட்சிப்படுத்துதல், வன்முறையைத் தூண்டும் பதிவுகளை வெளியிடுதல், சட்டவிரோதச் செயல்களுக்கு ஆதரவாகப் பிரசாரம் செய்தல் போன்ற செயல்பாடுகள் காவல்துறையால் உன்னிப்பாகக் கண்காணிக்கப்பட்டு வருகின்றன. இத்தகைய பதிவுகளின் தன்மை மற்றும் சட்டரீதியான விளைவுகளின் அடிப்படையில் விசாரணை மேற்கொள்ளப்பட்டு, சம்பந்தப்பட்டவர்கள் மீது சட்டப்படி நடவடிக்கை எடுக்கப்படுகிறது.
சட்டவிரோத உள்ளடக்கங்களை விரைவாகக் கண்டறிந்து, அவற்றை முடக்கவும் அல்லது நீக்கவும் சம்பந்தப்பட்ட சமூக ஊடக நிறுவனங்களுடன் காவல்துறை ஒருங்கிணைந்து செயல்பட்டு வருகிறது.
இணையவழிக் குற்றங்களைத் தடுக்கவும், பொதுமக்களின் பாதுகாப்பை உறுதிப்படுத்தவும், சமூக ஊடகங்களைத் தவறான நோக்கங்களுக்காகப் பயன்படுத்துவதைத் தடுக்கவும் தொடர்ந்து கண்காணிப்பு மற்றும் நடவடிக்கைகள் மேற்கொள்ளப்பட்டு வருகின்றன. இது குறித்து, சமூக ஊடகங்களைப் பயன்படுத்தி சட்டவிரோதச் செயல்களில் ஈடுபடுவோர், தனிநபர்களுக்கு அச்சுறுத்தல் ஏற்படுத்துவோர் அல்லது வன்முறை மற்றும் குற்றச் செயல்களைத் தூண்டும் வகையில் பதிவுகளை வெளியிடுவோர் மீது உரிய சட்ட நடவடிக்கை எடுக்கப்படும் என திண்டுக்கல் மாவட்ட காவல் கண்காணிப்பாளர் திரு. S. ஜெயக்குமார், இ.கா.ப., தெரிவித்துள்ளார்.
பொதுமக்கள் சமூக ஊடகங்களைப் பொறுப்புடனும் விழிப்புணர்வுடனும் பயன்படுத்த வேண்டும் எனவும், உறுதிப்படுத்தப்படாத தகவல்கள், வதந்திகள் மற்றும் சட்டவிரோத உள்ளடக்கங்களைப் பகிர்வதைத் தவிர்க்க வேண்டும் எனவும் அவர் கேட்டுக்கொண்டுள்ளார்.
திண்டுக்கல்லில் இருந்து நமது குடியுரிமை நிருபர்.
திரு.அழகுராஜா
