விருதுநகர் : விருதுநகர் மாவட்டம், சிவகாசி பகுதியில் உள்ள, அய்ய நாடார் ஜானகி அம்மாள் கல்லூரியில், சாலை பாதுகாப்பு விழிப்புணர்வு முகாம் நடைபெற்றது. கல்லூரி முதல்வர் அசோக் தலைமையில் நடைபெற்ற விழிப்புணர்வு முகாமில் சிவகாசி வட்டார போக்குவரத்து அலுவலர் குமரவேல், நுகர்வோர் பாதுகாப்பு சேவை மைய மாநில தலைவர் சுப்பிரமணியம் கலந்து கொண்டனர். போக்குவரத்து அலுவலர் குமரவேல் பேசும்போது, சாலை பாதுகாப்பின் அவசியம் குறித்தும், விபத்துகளை தவிர்க்கும் வழிமுறைகள் குறித்தும் மாணவர்கள் மத்தியில் பேசினார். மேலும் மனிதத் தவறுகளால் ஏற்படும் சாலை விபத்துகள் குறித்து குறும்படம் இயக்கி காட்டப்பட்டது. மேலும் வட்டார போக்குவரத்து அலுவலர் குமரவேல் தலைமையில் கல்லூரி மாணவர்கள் மற்றும் பேராசிரியர்கள், சாலை பாதுகாப்பு விழிப்புணர்வு உறுதிமொழி ஏற்றனர். கல்லூரியின் நுகர்வோர் மன்ற ஒருங்கிணைப்பாளர் முனைவர் சிவசங்கர் நன்றி கூறினார்.
மதுரையிலிருந்து நமது நிருபர்
திரு.ரவி
