கோவை : கோவை மாநகர காவல் ஆணையர் அவர்களின் உத்தரவு மற்றும் ஆலோசனையின் பேரில் (4/7/2023) ஆம் தேதி தமிழகத்தில் முதல்முறையாக கோவை மாநகரில் குற்ற வழக்குகளில் சம்பந்தப்பட்ட இளஞ்சிறார்களின் நலனுக்காக ஏணிப்படிகள் என்னும் இளஞ்சிறார் மறுவாழ்வு நிகழ்ச்சி கோவை மாநகர காவலர் சமுதாய கூடத்தில் (Police Community Hall) நடைபெற்றது. கோவை மாநகரின் எல்லைக்குள் உள்ள காவல் நிலையங்களில் வழக்குகளில் சம்பந்தப்பட்டுள்ள இளஞ்சிறார்கள் சமுதாயத்தில் இருந்து ஒதுக்கப்படாமல் சக மனிதர்களாக, பாவிக்கப்படுவதற்காகவும் அவர்களது வாழ்க்கையில் முன்னேற்றம் அடைய வேண்டும் என்பதற்காகவும், அவர்களின் தேவைகளை கருத்தில் கொண்டு நடவடிக்கை எடுக்கவும் மற்றும் அவர்களுக்கு தக்க ஆலோசனைகளை வழங்கவும் சம்பந்தப்பட்ட இளஞ்சிறார்களை அவர்களது பெற்றோர்களுடன் இந்நிகழ்ச்சிக்கு வரவழைக்கப்பட்டது.
ஏணிப்படி நிகழ்ச்சியில் இளஞ்சிறார்கள் மீண்டும் குற்ற நிகழ்வுகளில் ஈடுபடாமல் இருக்க தேவையான ஆலோசனைகளும் படிப்பில் கவனம் செலுத்தி பெற்றோர் சொல் கேட்டு நன் மதிப்பை பெற தேவையான ஆலோசனைகள் குழந்தைகள் பாதுகாப்பு நல நிபுணர்கள் மூலம் வழங்கப்பட்டது. மேற்படி ஏணிப்படிகள் நிகழ்ச்சியில் கலந்து கொண்ட இளஞ்சிறார்கள் தங்களுக்கு வேலைவாய்ப்பு, தொழில், படிப்பு வசதி, மற்றும் மருத்துவ உதவி, போன்றவற்றை கூறியுள்ளார்கள். இச்சிறார்களுடைய தேவைகளை பூர்த்தி செய்து கொடுக்க அந்தந்த காவல் நிலையத்தில் உள்ள குழந்தைகள் நல பாதுகாப்பு அலுவலர் மூலமாக தக்க ஏற்பாடுகள் செய்து கொடுத்து உரிய முயற்சி மேற்கொள்ளப்படும் என்று அவர்களுக்கு தெரிவிக்கப்பட்டுள்ளது. கோவை மாநகர காவல் ஆணையர் திரு.பாலகிருஷ்ணன் இ.கா.ப, அவர்கள் தலைமையில் நடைபெற்ற இந்நிகழ்ச்சியில் காவல்துறை ஆணையர் வடக்கு திரு.சதீஸ் இ.கா.ப, அவர்கள் காவல்துறை ஆணையர் தெற்கு திரு.சண்முகம் அவர்கள், மற்றும் கோவை இளஞ்சிரார் நீதிவாரிய உறுப்பினர்கள் திரு.மகேஷ் , திருமதி.ஜெனிஃபர் புஷ்பலதா மற்றும் குழந்தைகள் நலப் பாதுகாப்பு குழுமத்தின் தலைவர் திரு.சுப்பிரமணியம், கருப்பையா வழக்கறிஞர் திருமதி. சிவசங்கரி மற்றும் குழந்தை பாதுகாப்பு அலுவலர் திரு. சேரன் மற்றும் பாரதியார் பல்கலைக்கழக விரிவுரையாளர் திரு.முத்துகிருஷ்ணன் ஆகியோர் கலந்து கொண்டனர்.
கோவையிலிருந்து நமது குடியுரிமை நிருபர்
A. கோகுல்
