மதுரையில் 2 வாலிபர்கள் பலி
மதுரை : அய்யர்பங்களா நாகனாகுளம் கிருபா நகர் முதல் தெருவை சேர்ந்தவர் அம்மாசி மகன் அருண்குமார் (38), இவருக்கு திடீரென்று நெஞ்சுவலி ஏற்பட்டு மயங்கி விழுந்தார். இவரை உடனடியாக தனியார் மருத்துவமனைக்கு கொண்டு சென்று சிகிச்சை அளித்தனர். அங்கு சிகிச்சை பலனின்றி அவர் பரிதாபமாக உயிரிழந்தார். அவர் ஹார்ட் அட்டாக் வந்த நிலையில் மருத்துவமனைக்கு சென்று சிகிச்சை பெற்று உயிர் இழந்ததாக மருத்துவர்கள் தெரிவித்தனர். இது குறித்து அவருடைய மனைவி கௌசல்யா தல்லாகுளம் போலீசில் புகார் செய்தார். போலீசார் வழக்கு பதிவு செய்து அருண்குமாரின் சாவுக்கான காரணம் குறித்து விசாரணை நடத்தி வருகின்றனர்.
ஹார்ட் அட்டாக் நோய்க்கு மற்றொரு வாலிபர் பலி :
பழங்காநத்தம் ஆர்சி தெரு பென்னிமுத்து மகன் மைக்கேல் ரோமானியா (28), இவர் திருப்பரங்குன்றம் ரோடு யோகியார் நகர் சோடா கம்பெனி தெருவில் சென்று கொண்டிருந்தார் அப்போது திடீரென்று மயங்கி விழுந்தார். அவரை உடனடியாக சிகிச்சைக்காக மதுரை அரசு மருத்துவமனைக்கு கொண்டு சென்றனர் .ஆனால் செல்லும்வழியிலேயே அவர் பரிதாபமாக உயிர் இழந்தார் .இவரும் ஹார்ட் அட்டாக்கால் பாதிக்கப்பட்டு உயிர் இழந்ததாக மருத்துவர்கள் தெரிவித்தனர். இது குறித்து அவருடைய மனைவி புனிதா சுப்ரமணியபுரம் போலீசில் புகார் செய்தார். போலீசார் வழக்கு பதிவு செய்து மைக்கேல் ரொமானியாவின் சாவுக்கான காரணம் குறித்து விசாரணை நடத்தி வருகின்றனர்.
கோரிப்பாளையத்தில் பைக் ஆசாமிகள் கைவரிசை!
மதுரை மேல கள்ளந்திரியை சேர்ந்தவர் சுந்தர்ராஜ் மகன் கவுதம் (26), இவர் கோரிப்பாளையம் பந்தல்குடி பாலம் அருகே சென்று கொண்டிருந்தார். அப்போது பைக்கில் வந்த இரண்டு ஆசாமிகள் அவரிடம் இருந்த செல்போனை பறித்துச் சென்றுவிட்டனர். இந்த சம்பவம் குறித்து கவுதம் தல்லாகுளம் போலீசில் புகார் செய்தார். போலீசார் வழக்கு பதிவு செய்து அவரிடம் செல்போன் பறித்த பைக் ஆசாமிகளை தேடி வருகின்றனர்.
பேருந்து நிலையத்தில் செல்போன் திருடிய வாலிபர் கைது!
கூடலூர் மேடைக்கார தெருவை சேர்ந்தவர் அழகேசன் மகன் ராஜா (29),இவர் மதுரையில் பெரியார் பேருந்து நிலையம் பிளாட்பாரம் நம்பர் ஒன்றில் பஸ்சுக்காக காத்திருந்தார். இவருடைய செல்போனில் சார்ஜ் குறைந்துவிட்டது. இதனால் அங்கு உள்ள பிளக்பாயின்டில் சார்ஜ் ஏற்றிக் கொண்டிருந்தார். அப்போது அங்கு வந்த வாலிபர் அந்த செல்போனை திருட முயன்றார். அவரை பயணிகள் பிடித்து திடீர்நகர் போலீசில் ஒப்படைத்தனர். போலீசார் வழக்கு பதிவு செய்து விசாரணை நடத்திய போது கேரளா மாநிலம் கண்ணூர், கொட்டலை என்ற ஊரைச் சேர்ந்த முகமது கயா ஸ் மகன் ஜெனிபர்கயாஷ் 38 என்று தெரியவந்தது. அவரை போலீசார் கைது செய்தனர்.
சென்னை வாலிபரிடம் செல்போன் திருட்டு!
சென்னை பாண்டியநல்லூர் ஜோதி நகரை சேர்ந்தவர் ஆறுமுகம் மகன் ஆனந்த் (34), இவர் மதுரையில் உள்ள திருமண விழாவில் கலந்து கொள்ள வந்திருந்தார். அண்ணா நகரில் ரைஸ் மில் திருமண மண்டபத்தில் பங்கேற்றபோது திருமண கூட்டத்தில் அவரிடம் இருந்த செல்போனை மர்ம ஆசாமி திருடி சென்று விட்டார். இந்த சம்பவம் குறித்து ஆனந்த் அண்ணாநகர் போலீசில் புகார் செய்தார். போலீசார் வழக்கு பதிவு செய்து அவரிடம் செல்போன் திருடிய ஆசாமியை தேடி வருகின்றனர்.
குட்ஷெட் ரோட்டில் கஞ்சாவுடன் இரண்டு பேர் கைது
கூடல்நகர் குட்செட் ரோட்டில் கஞ்சா விற்பனை செய்வதாக கூடல்புதூர் போலீசாருக்கு தகவல் கிடைத்தது. அவர்கள் அந்த பகுதியை ரகசியமாக கண்காணித்தனர். அப்போது அங்கு கஞ்சா விற்பனையில் ஈடுபட்ட இரண்டு பேரை பிடித்தனர். பிடிபட்டவர்களை சோதனை செய்தபோது அவர்களிடம் ஒரு கிலோ 200 கிராம் கஞ்சா இருந்தது. அவற்றை பறிமுதல் செய்தனர். பிடிபட்டவர்களிடம் விசாரணை நடத்தினர். விசாரணையில் தத்தனேரி பாக்கியநாதபுரம் ஆதிராஜன் (42), தத்தனேரி கண்மாய்கரை, கணேசபுரம் பழனிச்சாமி மகன் ரமேஷ் என்ற ரமேஷ் பாஷா (28), என்று தெரியவந்தது .அவர்கள் இருவரையும் போலீசார் கைது செய்தனர்.
மதுரையிலிருந்து நமது நிருபர்
திரு.ரவி
