மதுரை: மதுரை, உசிலம்பட்டி அருகே காவலர் படுகொலை செய்யப்பட்ட வழக்கில் தேடப்பட்டு வந்த 5 வது குற்றவாளியை உசிலம்பட்டி தனிப்படை போலீசார் கைது செய்து விசாரணை நடத்தி வருகின்றனர். மதுரை மாவட்டம், உசிலம்பட்டி அருகே கள்ளப்பட்டியைச் சேர்ந்த முத்துக்குமார் என்ற காவலர் கடந்த 27ஆம் தேதி கல்லால் தாக்கி படுகொலை செய்யப்பட்டார். இதில்,
காவலருடன் வந்த அவரது உறவினரான ராஜாராம் என்பவர் படுகாயமடைந்து சிகிச்சை பெற்று வருகிறார். இந்த வழக்கில் 6 தனிப்படைகள் அமைத்து குற்றவாளிகளை தேடி வந்த போலீசார் கடந்த 29ஆம் தேதி தேனியில் வைத்து தேனி பி.சி.பட்டியைச் சேர்ந்த பொன்வண்ணன் என்பவரை போலீசார் சுட்டு பிடித்தனர். தொடர்ந்து, பாஸ்கரன், பிரபாகரன், சிவனேஸ்வரன் என்ற மூவரை கைது செய்து நேற்று 30 ஆம் தேதி நீதிமன்றத்தில் காவல்துறையினர் ஆஜர் படுத்தி சிறையில் அடைத்தனர். இந்நிலையில் இந்த வழக்கு தொடர்பாக தேடப்பட்டு வந்த ஐந்தாவது குற்றவாளியான நாவார்பட்டியைச் சேர்ந்த பிரதாப் என்பவரை உசிலம்பட்டி தனிப்படை போலீசார் இராஜபாளையம் ஸ்ரீவில்லிப்புத்தூர் இடையே காட்டுப் பகுதியில் வைத்து கைது செய்து உசிலம்பட்டி நகர் காவல் நிலையத்தில் தொடர் விசாரணை நடத்தி வருகின்றனர்.
