திருவள்ளூர்: திருவள்ளூர் மாவட்டம் மீஞ்சூர் அடுத்த புதுப்பேடு பகுதியை சேர்ந்தவர் கோபால் (67). இவரது 2மகன்கள் தனியார் நிறுவனத்தில் வேலை பார்த்து வரும் நிலையில் கடந்த 17ஆம் தேதி இவர்கள் குடும்பத்துடன் ஷீரடி கோவிலுக்கு சென்றுள்ளனர். வீட்டில் தனியாக இருந்த முதியவர் கோபாலும் உறவினர் திருமணத்திற்காக சென்று விட்டார். இந்நிலையில் கோவிலுக்கு சென்றவர்கள் வீடு திரும்பிய போது இவர்களது வீட்டின் பின்பக்க ஜன்னல் கம்பிகள் உடைந்தும் பீரோ உடைக்கப்பட்டு அதில் வைக்கப்பட்டிருந்த 30 சவரன் நகை கொள்ளை போனது தெரிய வந்தது. இது குறித்து அளித்த தகவலின் பேரில் சம்பவ இடத்திற்கு வந்த மீஞ்சூர் போலீஸ் விசாரணையில் ஈடுபட்டனர். தொடர்ந்து இந்த கொள்ளை சம்பவம் குறித்து வழக்கு பதிவு செய்து பூட்டிய வீட்டில் கைவரிசை காட்டிய கும்பலை வலை வீசி தேடி வருகின்றனர். ஷீரடி கோவிலுக்கு சென்றவர்கள் வீட்டின் ஜன்னல் கம்பியை உடைத்து 30சவரன் நகை கொள்ளையடிக்கப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.
திருவள்ளூரில் இருந்து குடியுரிமை நிருபர்
திரு. பாபு
