சென்னை : சென்னை மீனம்பாக்கம் விமான நிலையத்தின், பன்னாட்டு முனையத்தில், உள்ள கார் நிறுத்தும் கட்டிடத்தின் 5-வது மாடியில் இருந்து ஒரு வாலிபர் விழுந்து இறந்து கிடப்பதாக, விமான நிலைய காவல் துறையினருக்கு, தகவல் கிடைத்தது. உடனே விமான நிலைய காவல் துறையினர் , சம்பவ இடத்திற்கு விரைந்து சென்ற பார்த்த போது, வாலிபர் ஒருவர் முகத்தில் பலத்த காயத்துடன், ரத்தக்காயங்களுடன் கிடந்தார். இதையடுத்து காவல் துறையினர், அவரது உடலை கைப்பற்றி, பிரேத பரிசோதனைக்கு அனுப்பி வைத்தனர்.
பின்னர் அவரது சட்டை பையில் இருந்த, ஆதார் அட்டை எடுத்து அவர் யார்? ஏன் இங்கு வந்தார்? என்பது குறித்து காவல் துறையினர் விசாரித்தனர். அதில் பலியாகி கிடந்தது கள்ளக்குறிச்சியை, சேர்ந்த சபரி கணேஷ் (20), என்பது, அவர் கிண்டியில் உள்ள ஒரு தனியார், கல்லூரியில் பி.சி.ஏ. படித்து வந்ததும், தெரியவந்தது. இந்த நிலையில், இவா் விமான நிலைய கட்டுமான கட்டிடத்திற்கு, சென்று குதித்து தற்கொலை செய்து கொண்டாரா? அல்லது யாராவது அவரை அழைத்து வந்து அங்கு, இருந்து தள்ளி விட்டு கொலை செய்தார்களா? என பல்வேறு கோணங்களில் காவல் துறையினர் , விசாரணை நடத்தி வருகின்றனர். சென்னை விமான நிலையத்தில், வாலிபர் இறந்து கிடந்த சம்பவம் பயணிகளிடையே, பெரும் பரபரப்பை ஏற்படுத்தியது.
