தூத்துக்குடி: தூத்துக்குடி மாசிலாமணிபுரம் பகுதியைச் சேர்ந்த தில்லைராஜன் மகன் ராஜா ரகுபதி 26 என்பவர் கடந்த 07.10.2022 அன்று இரவு இருசக்கர வாகனத்தில் மாசிலாமணிபுரம் பகுதியில் சென்று கொண்டிருந்தபோது அங்கு வந்த அதே பகுதியைச் சேர்ந்த ஜெயராமன் மகன் சுதந்திர ராஜா 32 என்பவர் மது போதையில் ராஜா ரகுபதியை வழிமறித்து தகராறு செய்து இருசக்கர வாகனத்தை சேதப்படுத்தி அவரை கல்லால் தாக்கி கொலை முயற்சியில் ஈடுபட்டுள்ளார்.
இதுகுறித்து ராஜா ரகுபதி அளித்த புகாரின் பேரில் தென்பாகம் காவல் நிலைய ஆய்வாளர் திரு. ராஜாராம் வழக்கு பதிவு செய்து குற்றவாளி சுதந்திர ராஜாவை கைது செய்தார்.
மேற்படி கைது செய்யப்பட்ட குற்றவாளி சுதந்திர ராஜா என்பவர் மீது தூத்துக்குடி மத்தியபாகம், தென்பாகம், சிப்காட், கன்னியாகுமரி மாவட்டம் ஆசாரிப்பள்ளம், ராமநாதபுரம் மாவட்டம் பஜார் காவல் நிலையம், சென்னை மாவட்டம் கோயம்பேடு மற்றும் திருநெல்வேலி மாவட்டம் நாங்குநேரி ஆகிய காவல் நிலையங்களில் கொலை, கொலை முயற்சி உட்பட 16 வழக்குகள் உள்ளது குறிப்பிடத்தக்கது.
