திருச்சி: திருச்சி மாநகரில் கடந்த ஒரே மாதத்தில் பல்வேறு கொலை சம்பவங்களும், கொள்ளை சம்பவங்களும் அரங்கேறின. திருச்சி பாலக்கரை கீழப்புதூரை சேர்ந்த வழக்கறிஞர் கோபிகண்ணன் என்பவரை கடந்த 09.05.2021 இரவு 7 மணியளவில் ஹீபர் ரோடு AKB மோட்டார்ஸ் அருகில் முன்பகை காரணமாக 7 நபர்கள் அரிவாள் மற்றும் பெரிய கத்தி போன்ற பயங்கர ஆயுதங்களால் கொடூரமாக வெட்டி படுகொலை செய்து விட்டு தப்பியோடியது.
திருச்சி நீதிமன்ற காவல்நிலைய போலீஸார் வழக்கு பதிவு செய்து கொலை வழக்கில் ஈடுபட்டு தலைமறைவான 7 எதிரிகளையும், திருச்சி மாநகர காவல் ஆணையர் உத்தரவின்படி தனிப்படை உதவி ஆய்வாளர் கருணாகரன் தலைமையிலான சிறப்பு உதவி ஆய்வாளர் அந்தோணி செல்வம், தலைமை காவலர்கள் சரவணன், ஜானி, இனுஸ்டின், கெல்லர் ஜேக்கப், தனசேகரன் மற்றும் சவுக்கத் அலி ஆகியோர்கள் அடங்கிய குழுவினர் கொலை நடந்த 24 மணி நேரத்திற்குள் துரிதமாக செயல்பட்டு கொலை குற்றவாளிகளை கைது செய்தும், அவர்களை நீதிமன்ற காவலுக்கு உட்படுத்தியும் குற்றவாளிகளை நீதிமன்றத்திற்கு அடையாளம் காட்டிட உதவியாக இருந்துள்ளார்கள்.
இதே போன்று கடந்த 08.05.2021 அன்று பிரனவ் ஜுவல்லரி என்ற நகைக்கடை ஊழியர் மார்டின் ஜெயராஜ் சுமார் 11 கிலோ நகைகளை பெற்றுக் கொண்டு சென்னையிலிருந்து திருச்சிக்கு வரும் வழியில் மர்ம நபர்கள் அவரது நகைகளை கொள்ளையடித்தது
தொடர்பான உறையூர் குற்றப்பிரிவு காவல் நிலைய போலீஸார் வழக்கு பதிவு செய்து, வழக்கில் ஈடுபட்ட முக்கிய குற்றவாளிகளான 7 பேரையும் குற்றப்பிரிவு தனிப்படை உதவி ஆய்வாளர் சங்கரி தலைமையிலான சிறப்பு உதவி ஆய்வாளர்கள், மாதவன், செபஸ்டின், தலைமை காவலர் விஜயராஜ் ஆகியோர்கள் அடங்கிய குழுவினர் துரிதமாக செயல்பட்டு 12 மணி நேரத்திற்குள் கைது செய்து, அவர்களிடமிருந்து வழக்கின் சொத்தான தங்க நகைகள், கொலைக்கு பயன்படுத்திய ஆயுதங்கள் மற்றும் 2 நான்கு சக்கர வாகனங்கள் ஆகியவற்றை கைப்பற்றி நீதிமன்றத்திற்கு குற்றவாளிகளை அடையாளம் காட்டியிருக்கின்றனர்.
எனவே, இந்த குற்ற வழக்கில் சிறப்பாக செயல்பட்ட தனிப்படையினரை திருச்சி மாநகர காவல் ஆணையர் அருண் வெகுவாக பாராட்டி பணிப்பாராட்டு சான்று மற்றும் பண வெகுமதி வழங்கினார்.
வெகுமதி பெற்ற காவலர்கள் கூறுகையில், கடமையாற்றினோம் என்றில்லாமல் அந்த கடமைக்கான அங்கீகாரத்தையும், பாராட்டினையும் கொடுத்து வெகுமதி வழங்கிய ஆணையருக்கு நன்றிகள் என்றும், இந்த பாராட்டு மென்மேலும் எங்களை ஊக்கப்படுத்தியிருப்பதாகவும் தெரிவித்தனர்.
