திருநெல்வேலி : கூடங்குளம் காவல் நிலைய சரகத்திற்குட்பட்ட ஆற்றங்கரை பள்ளிவாசலுக்கு (11.07.2022)-ம் தேதி அன்று தென்காசி மாவட்டம், கடையநல்லூர் பகுதியைச் சேர்ந்த சாகுல் ஹமீது என்பவர் குடும்பத்துடன் வந்து இரவு பள்ளிவாசல் வளாகத்தில், தங்கி உள்ளனர். பின் (12.07.2022)-ம் தேதி மறுநாள் காலையில், எழுந்து பார்த்த போது சாகுல் ஹமீதின் இரண்டாவது மகளான நஜிலா பாத்திமாவை (3) காணவில்லை. இதுகுறித்து சாகுல் ஹமீது கூடங்குளம் காவல் நிலையத்தில், புகார் அளித்ததன் பேரில் திருநெல்வேலி மாவட்ட காவல் கண்காணிப்பாளர் திரு. ப.சரவணன் இ.கா.ப, அவர்களின் உடனடி நடவடிக்கையின் பேரில், ஆற்றங்கரை பள்ளிவாசல் அருகே உள்ள சிசிடிவி கேமராக்களின் பதிவுகளை வைத்து பார்த்ததில் மர்மநபர் குழந்தையை காரில் கடத்திச் சென்றது கண்டறியப்பட்டது.
இதன் அடிப்படையில், தென் மண்டலத்தில் உள்ள அனைத்து மாவட்ட காவல்துறையினருக்கும் தகவல் தெரிவித்து முக்கிய இடங்களில் மற்றும் வாகன சோதனை மற்றும் தீவிர தேடுதல் வேட்டையில் ஈடுபட்டனர்.
குறிப்பாக திசையன்விளை, கூடங்குளம், உவரி பகுதிகளில், தீவிர வாகன சோதனை நடைப்பெற்றது. இந்நிலையில் தூத்துக்குடி மாவட்டம் கிழக்கு கடற்கரை பகுதியில், சந்தேகத்திற்கிடமான வாகனம் செல்வதாக கிடைத்த தகவலை அடுத்து தூத்தூக்குடி மாவட்ட காவல்துறையினர், இரவில் உஷார்படுத்தப்பட்டனர், இதனால் தட்டார்மடம், குலசேகரப்பட்டினம், திருச்செந்தூர் பகுதிகளில் தீவிர தேடுதல் வேட்டையில், ஈடுபட்டனர். இந்நிலையில் (13.07.2022), -ம் தேதி இன்று கடத்தப்பட்ட குழந்தை நஜிலா பாத்திமா திருச்செந்தூர் அருகே இருப்பதாக கிடைத்த தகவலின் பேரில், திருச்செந்தூர் காவல்துறையினர், குழந்தையை மீட்டு தகவல் தெரிவித்ததன் பேரில், கூடங்குளம் காவல்துறையினர் விரைந்து திருச்செந்தூர் சென்று கடத்தப்பட்ட குழந்தையை மீட்டு தொடர்ந்து விசாரணை நடைப்பெற்று வருகிறது.
