சென்னை: இராயப்பேட்டை பகுதியை சேர்ந்த பத்ரிஷ், வ/20, என்பவர் 17.6.2021 அன்று தனது நண்பர்களான விக்கி, தினேஷ்ராஜ், ஆகியோருடன் சேர்ந்து அரும்பாக்கம் பகுதியில் உள்ள தனியார் ஹோட்டலில் அறை எடுத்து தங்கி மது அருந்தியுள்ளார். பக்கத்து அறையில் தங்கியிருந்த சிலர் பிறந்த நாள் கொண்டாடி அதிக சத்தம் போட்டுள்ளனர்.
உடனே பத்ரிஷின் நண்பர் விக்கி, பக்கத்து அறையின் தட்டி ஏன் இப்படி சத்தம் போடுகிறீர்கள் என கேட்டுள்ளார். அங்கிருந்த நபர்கள் விக்கியிடம் தகராறு செய்து வாக்குவதத்தில் ஈடுபட்டுள்ளனர். உடனே பத்ரிஷ், தினேஷ்ராஜ் ஆகியோரும் அங்கு சென்று தட்டிக்கேட்டுள்ளனர். இதனால் ஆத்திரமடைந்த நபர்கள் பத்ரிஷ், விக்கி, தினேஷ்ராஜ் ஆகிய மூவரையும் தாக்கியதால், பத்ரிஷ், விக்கி, தினேஷ்ராஜ் ஆகிய மூவரும் ஓட்டலுக்கு வெளியே ஓடி வந்துள்ளனர்.
மேற்படி நபர்கள் விடாமல் துரத்தி வந்து, அரும்பாக்கம் 100 அடி சாலையில் பத்ரிஷை மடக்கி சாலையில் கிடந்த ஹாலோ பிளாக் கல்லால் பலமாக தாக்கியுள்ளனர். தகவலறிந்த K-8 அரும்பாக்கம் காவல் நிலைய போலீசார் சம்பவயிடத்திற்கு விரைந்து சென்று காயமடைந்த பத்ரிஷை மீட்டு KMC அரசு மருத்துவமனைக்கு அனுப்பிவைத்தனர்.
அங்கு அவரை பரிசோதித்த மருத்துவர்கள் பத்ரிஷ் ஏற்கனவே இறந்து விட்டதாக தெரிவித்தனர்.
இது குறித்து பத்ரிஷின் நண்பர் தினேஷ்ராஜ் அளித்த புகாரின் பேரில் K-8 அரும்பாக்கம் காவல் நிலையத்தில் வழக்கு பதிவு செய்து விசாரணை செய்யப்பட்டது.
K8 அரும்பாக்கம் காவல் நிலைய ஆய்வாளர் தலைமையிலான காவல் குழுவினர் விசாரணை மேற்கொண்டு மேற்படி பத்ரிஷை ஹாலோ பிளாக் கல்லால் தாக்கி கொலை செய்த 1. இன்சியாஸ் மோசஸ், வ/23, அரும்பாக்கம், 2.தமிழ் இசக்கி, வ/22, அரும்பாக்கம், 3.சுரேஷ்குமார், வ/25, அரும்பாக்கம், 4.பாலாஜி, வ/23, அரும்பாக்கம் ஆகிய 4 நபர்களை கைது செய்தனர். மேலும் அவர்கள்மீது நீதிமன்ற நடவடிக்கை மேற்கொள்ளப்பட்டது.
