தூத்துக்குடி: தூத்துக்குடி மாவட்டம் முத்தையாபுரம் தங்கமணி நகர் பகுதியை சேர்ந்த தில்லை பாண்டி மகன் இசக்கிமுத்து 36. என்பவரது வீட்டில் கடந்த 20.10.2022 அன்று மர்ம நபர்கள் வீட்டின் பூட்டை உடைத்து உள்ளே புகுந்து அங்கு பீரோவில் வைக்கப்பட்டு இருந்த தங்க நகை வெள்ளி பொருட்கள் மற்றும் டிவி ஆகியவற்றை திருடி சென்றுள்ளனர். இதுகுறித்து இசக்கிமுத்து அளித்த புகாரின் பேரில் முத்தையாபுரம் காவல் நிலைய போலீசார் வழக்குபதிவு செய்து விசாரணை மேற்கொண்டனர்.
இச்சம்பவம் தொடர்பாக மாவட்ட காவல் கண்காணிப்பாளர் டாக்டர் திரு. எல். பாலாஜி சரவணன் அவர்கள் தூத்துக்குடி நகர காவல் துணை கண்காணிப்பாளர் திரு. சத்தியராஜ் மேற்பார்வையில் முத்தையாபுரம் காவல் நிலைய ஆய்வாளர் திரு. ஜெயசீலன் தலைமையில் உதவி ஆய்வாளர் திரு. மகாராஜன் மற்றும் தூத்துக்குடி நகர உட்கோட்ட தனிப்படை போலீசாருக்கு குற்றவாளிகளை கைது செய்து திருடுபோன பொருட்களை மீட்குமாறு உத்தரவிட்டார்.
அவரது உத்தரவின் பேரில் மேற்படி தனிப்படை போலீசார் அப்பகுதிகளில் உள்ள சி.சி.டிவி கேமரா பதிவுகள் மூலம் விசாரணை மேற்கொண்டதில், முத்தையாபுரம் பாரதி நகர் பகுதியை சேர்ந்த கருப்பசாமி மகன் காளிராஜ் 19. மற்றும் சிலர் சேர்ந்து மேற்படி இசக்கிமுத்துவின் வீட்டில் தங்க நகை மற்றும் வெள்ளிப் பொருட்களை திருடியது தெரியவந்தது.
உடனே மேற்படி தனிப்படை போலீசார் குற்றவாளி காளிராஜை கைது செய்து அவரிடமிருந்த திருடப்பட்ட ரூபாய் 22,500/- மதிப்புள்ள 5 கிராம் தங்க நகைகள் மற்றும் ரூபாய் 6,500/- மதிப்புள்ள 2 ஜோடி வெள்ளி கொலுசுகள் ஆகியவற்றை பறிமுதல் செய்தனர். மேலும் இதுகுறித்து முத்தையாபுரம் காவல் நிலைய போலீசார் விசாரணை மேற்கொண்டு மற்ற எதிரிகளையும் தேடி வருகின்றனர்.
