முகப்பருக்கள் சருமத்தில் பல்வேறு காரணங்களால் ஏற்படுகின்றன. மேலும் முகத்தில் மட்டுமின்றி கழுத்துப் பகுதி, கைகள், முதுகு உட்பட பிற பகுதிகளிலும் ஏற்படுகின்றன. பொதுவாக சருமத்தில் அதிகமாகும் எண்ணெய் உற்பத்தி, சருமத்துளைகள் அடைப்பு மற்றும் பாக்டீரியா தொற்றுக்கள் என பலவகை காரணங்களால் முகப்பருக்குள் தோன்றுகின்றன. மேலும் பதின்பருவ தொடக்கத்தில் பலருக்கும் முகப்பருக்கள் கட்டாயமாக ஏற்படும். அதில் பல முகத்தில் வடுவாகவோ கரையாகவோ தங்கி விடும்.
முகப்பருக்களும் சரும பொலிவும் : முகப்பருக்கள் நீண்ட காலத்திற்கு நம் அழகையும் கெடுக்கும். மேற்குறிப்பிட்ட காரணிகளை தாண்டி தினமும் நாம் உட்கொள்ளும் உணவுகளினால் கூட முகப்பருக்கள் ஏற்படுகின்றன. சில உணவுகளை உட்கொண்டால் முகப்பருக்கள் ஏற்படாமலும் தடுக்கப்படுகிறது. இது குறித்து ஊட்டச்சத்து நிபுணரான சிம்ரன் சோப்ரா ஒரு வீடியோ ஒன்றை பகிர்ந்துள்ளார். அந்த வீடியோவில் குறிப்பிட்டுள்ளவற்றை இந்த கட்டுரையில் காணலாம்.
தவிர்க்க வேண்டிய உணவுப்பொருட்கள் : முகப்பருவை அதிகரிக்கும் குளூட்டன் (பசையம்) உள்ள உணவுகள் குளூட்டன் அதிகமாக காணப்படும் உணவுப்பொருட்களை தவிர்க்க வேண்டும். பார்லி, ராய், டிரிட்டிக்கோல், கோதுமை ஆகியவை குளூட்டன் நிறைந்துள்ள உணவுப்பொருட்கள் . எனவே முகப்பருக்கள் உள்ளவர்கள் அல்லது வராமல் இருக்க நினைப்பவர்கள் இவற்றை தவிர்ப்பது நல்லது. குளூட்டன் இல்லாத உணவு பழக்கத்தை திட்டமிட உங்கள் டைட்டீசியனோடு கலந்தாலோசித்துக் கொள்வது நல்லது. இயற்கையான மற்றும் பதப்படுத்தப்படாத பழங்கள் காய்கறிகள், பீன்ஸ் , பருப்பு வகைகள், இறைச்சி, மீன் வகைகள் என பல குளூட்டன் இல்லாத உணவுகள் உள்ளன.
முகப்பருவை அதிகமாக்கும் பால் பொருட்கள் : அதிகப்படியான பால் உற்பத்திக்காக மாடுகள் வளர்ப்பவர்கள் சிலர் ஹார்மோன் ஊசிகளை மாடுகளுக்கு போடுகின்றனர். எனவே அதன் பாலை குடிக்கும் நமக்கும் இது ஹார்மோன் சமநிலையை பாதிக்கிறது. மேலும் இந்த பாலில் IGF1 அதிகமாக இருப்பதால் இது நம் உடலில் இன்சுலின் அளவை அதிகரித்து சீரியஸான முகப்பரு பிரச்சினைகளுக்கு காரணமாகிறது.
முகப்பருவை அதிகரிக்கும் எண்ணெய் உணவுகள் : பொதுவாகவே இந்திய உணவுகள் அதிகமான எண்ணெய் பயன்படுத்தி செய்யப்படுகின்றன. இதுவும் முகப்பருக்கள் அதிகம் ஏற்பட காரணமாகிறது. அதிக கொழுப்புச் சத்தை உட்கொள்ளுதல் முகப்பருவோடு சேர்த்து பல்வேறு உடல் உபாதைகளுக்கு காரணமாகிறது. எண்ணெய் உணவுகள் சருமத்தின் வெப்பநிலையை அதிகரிக்கச் செய்வதோடு சீபம் சுரப்பை தூண்டிவிடும். அதனால் முகப்பரு உண்டாவது அதிகரிக்கும்.
எந்த உணவை தினசரி சேர்த்துக் கொள்ளலாம் : முகப்பருவை குறைக்கும் நட்ஸ் மற்றும் விதைகள், நட்ஸ் மற்றும் விதைகளில் அதிக அளவில் புரதச்சத்தும் நிறைய மினரல்களும் நிறைந்திருக்கின்றன. இவை உடலுக்கு ஆற்றலை தருவது போலவே சருமத்துக்குப் போதிய ஊட்டச்சத்துக்களையும் சேர்த்து வழங்குகிறது. தினமும் மற்ற ஸ்நாக்ஸ்கள் எடுத்துக் கொள்வதற்கு பதிலாக சூரியகாந்தி விதை, பூசணி விதை, ஆளி விதை, வெள்ளரி விதை போன்ற விதை வகைகளை தினசரி டயட் பட்டியலில் சேர்த்துக் கொள்ளலாம். இது சரியான வைட்டமின்களை உங்கள் உடல் பெறுவதற்கு உதவும்.
முகப்பரு வராமல் தடுக்கும், ஒமேகா 3 கொழுப்பு அமிலங்கள் : ஒமேகா 3 உடலுக்கு மிகவும் நல்லது. குறிப்பாக இதய ஆரோக்கியத்தை மேம்படுத்தக் கூடியது. இந்த ஒமேகா 3 கொழுப்பு அமிலங்கள் நட்ஸ், மீன் வகைகள், ஆலிவ் ஆயில் மற்றும் அவகேடோ ஆகியவற்றில் அதிகமாக நிறைந்து இருக்கின்றன. இது சரும பிரச்சினைகளை சரிசெய்ய உதவுகின்றன. மீன் எண்ணெய் சப்ளிமெண்ட்டுள் கடைகளில் கிடைக்கின்றன. ஆனாலும் நேரடியாக உணவாக எடுத்துக் கொள்ளும்போது அதன் முழுமையான பலன்களை நம்மால் பெற முடியும்.
முகப்பரு வராமல், இருக்க தண்ணீர் : உடலை நீரேற்றமாக வைத்திருப்பது உடலுக்கு மட்டுமின்றி சருமத்துக்கும் மிக நல்லது. இது உடலில் உள்ள கழிவுகளை வெளியேற்ற உதவும். அதனால் உடலும் சருமமும் புத்துணர்ச்சியாக இருக்கும். நிறைய தண்ணீர் குடிப்பது நல்லது. தினமும் குறைந்தபட்சம் மூன்று லிட்டர் தண்ணீரை கட்டாயம் குடிக்க வேண்டும். அப்படி குடிக்கும்போது பாக்டீரியாதொற்றுக்களால், சருமத்தில் உண்டாகும் முகப்பருக்களை அகற்ற முடியும். மேலும் உங்கள் முகத்தை பொலிவாகவும், ஈரப்பதமாகவும் வைத்துக் கொள்ளவும் தண்ணீர் உதவுகிறது..
