கோவை : கோவை மாவட்ட சைபர் கிரைம் காவல் நிலையத்தில் துடியலூர் பகுதியை சேர்ந்த (21) வயது இளம்பெண் கொடுத்த புகாரில் கடந்த மாதம் தனது Instagram-ல் தன்னுடைய புகைப்படங்களை ஆபாசமாக சித்தரிக்கப்பட்டு தன்னை ஆபாசமாக மார்பிங் செய்து வீடியோக்களை வெளியிடப்பட்டிருந்ததாகவும் மேலும் தனது தந்தையின் டுவிட்டர் (Twitter) பக்கத்திலும் மேற்கண்ட புகைப்படங்கள் மற்றும் வீடியோக்களை பதிவிடப்பட்டிருந்ததாகவும் இதுபோன்று சமூக வலைதளங்களில் தனது புகைப்படங்கள் மற்றும் வீடியோக்கள் வெளியானது தொடர்பாக இது குறித்து நடவடிக்கை எடுக்கக்கூறி புகார் அளித்துள்ளார். இது தொடர்பாக உரிய நடவடிக்கை எடுக்க வேண்டி கோவை மாவட்ட காவல் கண்காணிப்பாளர் திரு.பத்ரிநாராயணன், இ.கா.ப., அவர்கள் உத்தரவின் பேரில் சைபர் கிரைம் காவல் நிலையத்தில் வழக்கு பதிவு செய்து இக்குற்றத்தில் தொடர்புடைய கோவை காந்தி பார்க் பகுதியை சேர்ந்த சீனிவாசன் மகன் சஞ்சய்குமார் (22), என்பவரை கைது செய்து அவரிடமிருந்து மேற்படி குற்ற செயலுக்கு பயன்படுத்திய செல்போன் -1, சிம் கார்டு-1 மற்றும் பென்டிரைவ் ஆகியவற்றை பறிமுதல் செய்து மேற்படி நபரை நீதிமன்ற காவலுக்கு உட்படுத்தினர்.
மேலும் இது குறித்து கோவை மாவட்ட காவல் கண்காணிப்பாளர் அவர்கள் சமூக வலைதளங்களில் இவ்வாறு பெண்களை தவறாக சித்தரிப்பவர்கள் மீது கோவை மாவட்ட காவல்துறை மிகவும் கடுமையான சட்ட நடவடிக்கைகள் எடுத்து வருவதாகவும் மேலும் பெண்கள் மற்றும் கல்லூரி மாணவிகள் இவ்வாறு சமூக வலைதள குற்றங்களில் பாதிக்கப்படும்போது, இது தொடர்பாக எவ்வித தயக்கமுமின்றி புகார் அளிக்க முன் வரவேண்டும். அவ்வாறு புகார் கொடுக்கும் பட்சத்தில் புகார் மீது விரைந்து நடவடிக்கை மேற்கொள்ளப்படும். மேற்கண்ட இவ்வாறான குற்றங்கள் நடைபெறாமல் வருங்காலங்களில் தடுக்க முடியும் எனவும் தெரிவித்தார். மேலும், இணையதளம் மூலமாக உங்களது பணத்தை இழந்து விட்டால் 1930 என்ற எண்ணில் தொடர்பு கொள்ளவும் என்றும் சைபர் கிரைம் புகார்களுக்கு www.cybercrime.gov.in என்ற இணையதள முகவரியில் பதிவு செய்தால் கோவை மாவட்ட சைபர் கிரைம் காவல்துறையினர் உங்களை தொடர்பு கொண்டு நீங்கள் இழந்த பணத்தை மீட்டுக் கொடுப்பதற்கான நடவடிக்கைகள் மேற்கொள்ளப்படும் என்றும் கூறியுள்ளார்.
கோவையிலிருந்து நமது குடியுரிமை நிருபர்
A. கோகுல்
