சென்னை : சென்னை, ஆமதபாத்திலிருந்து சென்னை வந்த விமானத்தில், தடையை மீறி புகைப்பிடித்த பயணியை,சென்னை விமானநிலைய காவல்துறையினர், கைது செய்தனர். குஜராத் மாநிலம், ஆமதபாத்திலிருந்து சென்னைக்கு, ‘இண்டிகோ ஏர்லைன்ஸ்’ விமானம், 137 பயணியருடன் வந்தது. இதில், மத்திய பிரதேசத்தைச் சேர்ந்த சந்தீப் குமார், (34), என்பவர் பயணம் செய்தார். விமானம் நடுவானில் பறந்து கொண்டிருந்த போது, மறைத்து வைத்திருந்த சிகரெட் மற்றும் லைட்டரை எடுத்து, விமான கழிப்பறை அருகே புகைப்பிடித்தார்.
இதை, சக பயணியரும், விமான பணிப் பெண்களும், கண்டித்ததை, அவர் அலட்சியப்படுத்தினார். இது குறித்து, சென்னை விமான நிலைய கட்டுப்பாட்டு அறைக்கு, உடனடியாக தகவல் தெரிவிக்கப்பட்டது. சென்னையில் விமானம் தரையிறங்கியதும், சந்தீப் குமாரை சோதனை செய்து, சென்னை விமானநிலைய காவல்துறையினரிடம், அதிகாரிகள் ஒப்படைத்தனர், இது தொடர்பாக, வழக்கு பதிந்த காவல் துறையினர், அவரை கைது செய்தனர்.
