கடலூர் : கடலூர் மாவட்டம், பண்ருட்டி அருகே பெரிய எலந்தம்பட்டு கிராமத்தை சேர்ந்தவர் ரவிச்சந்திரன். இவருடைய மனைவி லட்சுமி (53), இவர் தனக்கு சொந்தமான 15 சென்ட் காலி இடத்தை சின்ன சேமக்கோட்டையை சேர்ந்த லேத் பட்டறை நடத்தி வரும் சிவகண்டன் என்பவரிடம் கிரயம் செய்வதற்காக ரூ.47 லட்சம் பேசியிருந்தார். இதையடுத்து சிவகண்டன் முன்பணமாக ரூ.20 லட்சத்தை லட்சுமியிடம் கொடுத்துள்ளார். மீதமுள்ள ரூ.27 லட்சத்தை பத்திரம் பதிவு செய்து விட்டு தருவதாக கூறியிருந்தாா். அதன்படி நேற்று நிலத்தை பத்திரப்பதிவு செய்வதற்காக லட்சுமி தனது குடும்பத்தினருடன் புதுப்பேட்டை பத்திரப்பதிவு அலுவலகத்திற்கு வந்திருந்தார். இதேபோல் சிவகண்டனும், பணத்துடன் பத்திரப்பதிவு அலுவலகத்துக்கு வந்தார்.
ரூ.27 லட்சம் பறிப்பு இந்த நிலையில் பத்திரப்பதிவு செய்து முடிந்தவுடன், லட்சுமியும், சிவகண்டனும் பத்திரப்பதிவு அலுவலகம் முன்பு நின்று பேசிக்கொண்டிருந்தனர். அப்போது அங்கிருந்த 30 வயது மதிக்கத்தக்க வாலிபர் ஒருவர், லட்சுமிக்கு கொடுப்பதற்காக சிவகண்டன் வைத்திருந்த பணப்பையை பறித்துக்கொண்டு தப்பி ஓடினார். அந்த வாலிபரை பிடிக்க முயன்றும் முடியவில்லை. பின்னர் சிவகண்டனும் அங்கிருந்து புறப்பட்டு சென்று விட்டார். இதுகுறித்து லட்சுமி புதுப்பேட்டை காவல் துறையில், புகார் கொடுத்தார். அதன்பேரில்காவல் துறையினர் , வழக்குப்பதிவு செய்து பணத்தை பறித்து சென்ற வாலிபரை வலைவீசி தேடி வருகின்றனர். பத்திரப்பதிவு அலுவலகம் முன்பு ரூ.27 லட்சத்தை பறித்து சென்ற சம்பவம் அப்பகுதியில், பரபரப்பை ஏற்படுத்தி உள்ளது.
